BUTUAN CITY- Gipadayag ni House Speaker Faustino “Bojie” Dy III nga “all hands on deck” ang gobyerno samtang pas-pas nga gitubag sa Kamara ang sugyot-balaodnon nga magtugot sa temporaryong suspensyon sa mandatory biofuel blending human kining gideklara ni President Ferdinand Marcos Jr isip urgent.
Ang House Bill 8469 o Oil Price Stabilization Act maghatag sa Presidente og gahom nga temporaryong ipahunong ang biofuel blending ugaling ang presyo sa blended fuel molabaw sa 5 ka porsiyento kumpara sa pure gasolina o diesel, aron nga makunhoran ang presyo sa mga pump.
Sumala ni Speaker Dy, ang sertipikasyon sa Presidente nagpakita og urget need nga protektahan ang mamalitay nga Pilipino batok sa pagsaka sa presyo sa lana taliwala sa krisis sa Tunga-tungang Sidlakan.
Ang sugyot nagtumong nga amyendahan ang Section 5 sa Biofuels Act of 2006 ug tugotan ang Presidente nga suspindihon ang lokal nga biofuel hangtud usa ka tuig base sa rekomendasyon sa National Biofuels Board ug Department of Energy.
Sa kasamtangan, ang gasolina ug diesel sa nasud obligadong adunay sagol nga bioethanol ug biodiesel, apan posibleng mopasaka og presyo ugaling magmahal o kuwang ang supply sa biofuel.
Ang temporaryong suspensyon gilaomang makatabang aron magpabiling kontrolado ang presyo ug masighuro nga igo ang supply sa enerhiya.
