BUTUAN CITY- Gitaho ni Iranian Police Chief Ahmadreza Radan niadtong Domingo nga 500 ka katawhan ang nadakpan tungod sa alegasyon nga naghatag og impormasyon ngadto sa Israel samtang nagpadayon ang tensiyon sa rehiyon.
Sumala ni Radan, tunga sa mga kaso adunay kalabotan sa seryosong insidente sama sa paghatag og lokasyon sa posibleng target ug pagkuha og footage sa mga lugar sa Airstrike ug gipadala sa lain.
Gikumpirma usab sa state news nga 20 ka indibidwal ang giakusahan sa pagpadala og datos bahin sa military ug security assets sa Iran, samtang sa northeastern Iran 10 ka tawo ang nadakpan tungod sa pagkuha og sensitibong impormasyon sa mga military base.
Sa Lorestan province, tulo usab ang giingong nadakpan tungod sa pagsunog sa mga mourning symbols. Usa ka sangay sa Revolutionary Guards’ intelligence ang nagpasabot nga gigamit sa Israel ug Estados Unidos ang mga “mercenaries ug spies” aron makapahimo og kagubot, ug giingon nga gisugdan na sa Israel ang pagtarget sa mga security checkpoints base sa impormasyon gikan sa mga informant.
Kini nga panghitabo nagdugang sa kasamtangang tensiyon human sa hlapad nga protesta kontra-gobyerno niadtong Enero nga giakusahan sa mga awtoridad nga gipasiugda sa Israel ug U.S. aron pabagsakon ang clerical establishment sa nasud.
