BUTUAN CITY- Nakahatag og dakong kalisod sa mga mag-uuma ang natigayong kagubot sa Middle East ingon man ang dakong pagsaka sa presyo sa lana.
Sumala ni Danilo “Ka Daning” Ramos, Chairperson sa Kilusang Magbubukid ng Pilipinas, nga ang pagsaka sa presyo sa lana nagpasamot sa kalisdanan sa mga mag-uuma nga naggamit og diesel ug gasolina sa traktura.
Sa case study sa ilang probinsya, usa ka mag-uuma ang nakagamit og 60 litros nga gasolina kansa nagkantidad og P4,524, ug kung tangtangon ang VAT ug excise tax makaminos og halos P960 matag ektarya.
Sigon pa ni Ramos, nga ang kagubot sa Middle East ug ang pagsaka sa presyo sa lana naka-apekto usab sa mga presyo sa nag-uanang palaliton ug transportasyon, ingon man kapin 2 milyon ka Overseas Filipino Workers kon OFWs sa Middle East kansa lakip usab sa epekto sa krisis.
Gipabutyag usab niini, nga ang kabalaka sa seguridad human sa pagpamomba sa Iran sa Dubai nga adunay base militar sa US, makahatag usab og piligro sa Pilipinas tungod aduna matud pay siyam hangtod napulo ka EDCA sites ang nasud.
Gani, iyang gi-awhag ang kagyat nga pag-undang sa agresyon sa US ug ang pagrepaso sa Oil Deregulation Law aron maprotektahan ang katawhan.
Dugang pa ni Ramos, nga dili igo ug makadaot ang paghatag og kapangyarihan kang President Ferdinand Marcos Jr. aron isuspinde ang excise tax sa lana, ug mas peligroso pa ang paghatag og emergency powers.
Iyang gisaway ang plano sa Malacañang nga four-day work week ug ang fuel subsidy nga limitado ra ug nahimong tinubdan sa korapsyon sa miaging panahon.
Giingon usab ni Ramos nga ang gi-anunsyo nga ₱10 bilyon nga ayuda alang sa mga mag-uuma ug mangingisda mahimong mitsa sa korapsyon.
Matod pa niya, kung tangtangon ang VAT ug excise tax sa lana, awtomatikong makapahimulos ang tanang Pilipino sa Luzon, Visayas ug Mindanao.
Busa, iyang gi-awhag nga panahon na aron irebyu ug iripaso ang Oil Deregulation Law nga gisugdan pa ni President Fidel Ramos niadtong Abril 1996
