BUTUAN CITY – Gi-awhag sa mga health authorities ang publiko nga palawman ang ilang kahibalo ug preventive measures samtang gisa-ulog ning buwan sa Marso ang Colorectal Cancer Awareness Month.
Sumala sa Department of Health (DOH), ang kampanya gihimo aron madugangan ang kahibalo sa mga tawo bahin sa paglikay, sayong pag-ila, ug sakto nga pagtambal sa colorectal cancer, nga usa sa mga kanser nga maoy hinungdan sa daghang kamatayon sa nasud.
Ang colorectal cancer motubo sa colon o rectum nga kasagaran magsugod sa gagmay nga bukol nga gitawag og polyps, nga mahimong mahimong kanser kung dili matambalan.
Mas kasagarang makita kini sa mga tawo nga 50 anyos pataas.
Ang mga posibleng sintomas mao ang kausaban sa paglibang sama sa diarrhea o constipation, pagbaton og dugo sa atong hugaw, sakit sa tiyan, kalit nga pagkunhod sa timbang ingon man kakapoy o anemia.
Gidasig sa DOH ang publiko nga magpuyo og himsog nga estilo sa kinabuhi aron maminusan ang risgo sa sakit lakip niini ang pagkaon og pagkaon nga daghan og fiber, regular nga ehersisyo, pagmintina sa himsog nga timbang ingon man paglikay sa panigarilyo ug sobra nga pag-inom og alkohol.
Samtang, nagpahinumdom ang PhilHealth nga ang pagtambal sa colorectal cancer sakop sa ilang Z Benefit Package kondiinma-avail ang hangtod sa ₱150,000 nga coverage alang sa Stage 1–2 low-risk colon cancer, samtang hangtod ₱300,000 alang sa Stage 2–3 high-risk cases samtang alang sa rectal cancer, mahimong moabot sa ₱150,000 hangtod ₱400,000 depende sa stage ug pagtambal.
