BUTUAN CITY – Nakighi-usa ang Federation of Free Workers sa pagsa-ulog karong adlawa sa International Women’s Day nga duna’y temang ‘Rights, Justice, Action For All Women and Girls.’
Sa eksklusibong pakighinabi sa Bombo Radyo Butuan, gipadayag sa presidente sa maong kahugpungan nga si Atty Sonny Matula nga karong adlawa, duna sila’y kalihukan sa Metro Manila ilabina ang ilang women’s network partikular sa Liwasang Bonifacio.
Ubay-ubay nga mga kalihukan ang himuon sama sa pagmartsa gikan sa alas-otso ning buntaga nga magsugod dapit sa Manila City Hall padulong sa Liwasang Bonifacio diin himuon ang programa.
Kini isip pag-ila sa papel sa kababayen-an diha sa katilingban ilabina nga katunga sa populasyon, gilangkuban man sa kababayen-an, rason nga dili angayang mabilin ang ilang hut-ong pinaagi sa pagpaminaw sa ilang tingog nga dako og ikatampo sa kalambuan sa komunidad.
