BUTUAN CITY – Angayang duna na’y mugnaong crisis management team ang lokal nga kagamhanan ning siyudad sa Butuan karong paspas na ang pagsaka sa presyo sa mga produktong petrolyo aron maoy muplastar, mupatawag ug magplano sa angayang buhaton aron dili kaayo bug-at ang epekto niini ngadto sa publiko.
Sigon ni Ritchie Ravelo, presidente sa Federation of Eastern Suburb Four-Seater Tricycle Operators and Drivers Association, dili na kinahanglang hangyuon pa sa katawhan ang LGU tungod kay sila ang dapat manguna pagpatawag sa mga apektadong sektor tungod kay ila matud pang obligasyon ang paglantaw sa mga angayang himuon sa ingon niini nga panahon nga makonsidera matud pa kini nga kalamidad o krisis.
Bisan matud pa nga aduna’y ordinansang gipapasar ang city council kalabot sa ipatumang plitehan depende sa ceiling sa presyo sa mga oil products, angayan na matud pang lantawon kung pila ang ipatumang plitehan. Kinahanglan usab matud pa nga mangayo og kopya niini ang mga drayber sa pampublikong sakyanan tungod kay seguradong mahimo unya kining dakong lalis sa mgapasahero.
Karon na usab matud pa ang tukmang panahon nga muhatag na og ayuda ang lokal nga kagamhanan ngadto sa mga public utility vehicles nga naghatag og serbisyo sa katawhan tungod kay lugi kaayo sila sa ilang kita nga gila-umang musamot pa sunod semana diin gila-uman pa ang dako kaayong pagsaka sa presyo mga oil products.
Dugang pa ni Ravelo, kung magpadayon matud pa ang giyera sa Middle East ug dili maka-agi ang mga barko sa Strait of Hormuz, lauman ang pagdako pa sa presyo ilabina nga ang China nagmando na nga dili na mag-export og lana kansa dakong epekto sa Pilipinas nga nagsalig lang sa mga oil exporting countries.
Panahon na usab nga ang excise tax sa oil products, isuspende una aron makatapal-tapal sa galastuhan ilabina nga klaro na sa tanan nga ang buhis sa katawhan gikurakot ra sa mga tag-as nga opisyal sa gobyerno.
Mahimo matud pang ibalik ang excise tax kung okey na ang tanan ilabina ang presyo sa mga produktong petrolyo.
