BUTUAN CITY – Anaa na sa maayong kondisyon karon ang Mindanaoan boxer nga si Jordan ‘Tuklaw’ Atlao, human na-coma dihang na-collapse atol sa iyang training sa Don Punch Promotions ning siyudad sa Butuan.
Sa eksklusibong pakighinabi sa Bombo Radyo Butuan, gikumpirma sa iyang manager og promoter nga si Dondon Llagas nga pagkagabii gilayon niadtong Marso 2 human natumba si Atlao pasado alas-dos sa hapon, gidala gilayon nila kini sa ACE Medical Center ning siyudad kondiin na-operahan siya pasado alas-9:30 sa gabii nga nahuman pasado alas-kwatro usab sa kaadlawon sa Marso 3.
Madumdumang mihimo og duha ka hugna sa sparring sessions si Tuklaw niadtong adlawa isip preparasyon sa iyang 8-round nga away karong Mayo 29 nga himuon sa Korakuen Hall sa Japan batuk kang Japanese boxer Ryota Yamauchi.
Dili na matud pa kini madayon tungod sa hitabo kondiin nakasinati kini og severe traumatic brain injury nga mugna matud pa sa pag-inom og daghang tubig samtang kamulo pa og pasingot.
Aminado si Llagas nga hagip-ot ang panudlanan sa mga ginikanan ni Atlao rason nga nanawagan siya sa tanang duna’y malumo nga kasing-kasing nga mutunol og tabang.
Kini ilabina nga ang ilang stable usab, igo-igo ra ang kita nga dili makasarang nga mu-cover sa galastuhan sa ospital ilabina nga duna pa sola’y laing mga boksidor nga ila pang giyahan aron makab-ot usab ang ilang pangandoy.
Nasayrang si Atlao usa ka contender champion kon naghawid sa flyweight division belt ubos sa timbang nga 112-libras sa Philippine Boxing Federation kon PBF nga duna’y record nga unom ka daug ug usa ka pildi.
Nakuha matud pa ni Atlao ang kampyunato sa iyang away ning mi-aging tuig sa Cantilan, Surigao del Sur human niya naparot si Francis Jay Diaz nga taga-Cagayan de Oro City. I-away pa unta nila si Atlao dinhi sa siyudad apan tungod kay duna’y offer kaniya nga away sa Japan, rason nga kini ang ilang gipangandaman.
