BUTUAN CITY – Gipamugos sa pipila ka mga magbabalaod sa Kamara nga igo sa substansiya ang video sa matud pa hulga sa pagpatay aron maka-abante ang ikaupat nga basehan sa ikatulong impeachment complaint batuk kang Vice President Sara Duterte.
Sa pagdungog sa House Committee on Justice nga gipangunahan ni Batangas Rep. Gerville “Jinky Bitrics” Luistro, gipagawas ang viral nga video diin madungog si Duterte nga nagmandu sa pagpatay ugaling siya mapatay.
Sumala ni ML Party-list Rep. Leila de Lima, ang nasangpit nga pamahayag dili simpleng retorika kundi dunay kabug-at nga implikasyon sa balaod.
Gitumbok usab nila Rep. Ysabel Maria Zamora, Rep. Zia Alonto Adiong, ug Rep. Janice Degamo nga ang paglitok nga pagkuha og assassin tataw nga pagluib sa pagsalig sa publiko ug mamahimong mosangpot sa aktuwal nga kagubot.
Bisan paman sa kabalaka ni Rep. Jesus “Bong” Suntay mahitungod sa gawasnong pagpadayag ug kakulang sa ebidensiya sa aktuwal nga kasabutan, gibarugan sa kadaghanan nga dunay igong basehan aron ikonsidera nga impeachable offense ang nasangpit nga pamahayag sa Bise Presidente.
