BUTUAN CITY – Dead on arrival dihang naka-abot sa Cabadbaran District Hospital ang usa ka 18-anyos nga si Jhonmel Bañada, residente sa Purok 10, Barangay Del Pilar, human matabunan sa midahiling yuta sa Sitio Pirada, Brgy. Del Pilar, Cabadbaran City.
Sa eksklusibong pakighinabi sa Bombo Radyo Butuan, gipahibalo ni Roselyn Exaure, tigpamaba sa Cabadbaran City, nga ang biktima usa ka small-scale miner sa maong dapit. Base sa imbestigasyon sa Cabadbaran City Police Station, nahibaw-an nga samtang ang biktima uban sa iyang mga katrabaho nagpahuway sa bunkhouse, kalit nilang namatikdan nga midahunog ang yuta tungod sa walay undang nga kusog nga ulan.
Swerte nga nakadagan dayon ang tulo ka kauban niini kondiin na-apsan gayod sa midahiling yuta ang biktima. Hinuon andam ang lokal nga panggamhanan paghatag og tabang alang sa pamilya nga na-ilo sa maong trahedya.
Tungod sa bagyo, mi-abot usab sa 158 ka mga pamilya kon bugti sa 594 ka mga indibidwal ang gihikling sa mga evacuation centers sa nagkada-iyang barangay.
Samtang dugang pa ni Exaure, kagahapong adlawa lang usab nagpagawas ang lokal nga kagamhanan og ₱14,000 matag-pamilya ngadto sa 270 ka mga benepisyaryo nga Cabadbaranong nagpuyo duol sa mga danger zone areas sama sa baybayon sa La Union ug Kalibunan.
Sa maong kantidad, ₱10,000 ang gi-allocate alang sa pagpalit og materyales aron masiguro nga dili kini magamit sa lain nga katuyoan, samtang ang ₱4,000 cash magamit sa pagpanday sa balay.
