BUTUAN CITY – Malampuson nga nakabalik sa kalibutan ang mga astronauts sa International Space Station (ISS) Crew-11 human sa sayong pagtapos sa ilang misyon, dihang nag-splashdown ang SpaceX Dragon Endeavour capsule sa Dagat Pasipiko, sa baybayon sa San Diego ning adlawa.
Gihimo ang parachute-assisted splashdown pasadao alas 3:41 sa kaadlawon (local time), human mibulag ang kapsula gikan sa Harmony module sa ISS sa mga alas 5:20 sa hapon niadtong Enero 14.
Gipaila ang mga NASA astronauts nga sakay sa misyon nga sila Zena Cardman (commander) ug Mike Fincke (pilot), kauban ang mga mission specialist nga sila Kimiya Yui sa Japan Aerospace Exploration Agency (JAXA) ug Oleg Platonov, usa ka Russian cosmonaut.
Nasayran nga ang sayong pagbalik sa Crew-11 tungod sa usa ka wala gipadayag nga isyu sa kahimsog nga naglambigit sa usa sa mga tripulante.
Mahinumduman nga gipahibalo sa NASA niadtong Enero 8 nga tapuson na og mas sayo ang misyon, apan wala ginganlan ang apektadong astronaut.
Human sa splashdown, gisailalom sa inisyal nga medical checks ang mga crew member sakay sa recovery vessel. Gilauman nga dad-on una sila sa pampang sa wala pa molupad padulong sa Johnson Space Center sa Houston.
Gipadala ang Crew-11 paingon sa ISS niadtong Agosto 1, 2025, ug miabot sa orbital laboratory pagkahuman sa usa ka adlaw alang sa orihinal nga unom ka bulan nga misyon.
