BUTUAN CITY- Gi-anam-anam na sa Estados Unidos ug United Kingdom ang pagpanguha sa ilang personnel sa Al-Udeid Air Base sa Qatar, samtang gihunahuna ni US President Donald Trump ang posibleng aksyon batok sa Iran tungod sa grabe nga crackdown sa mga anti-government protest diin nakapatay na og kapin 2,400 ka demonstrador.
Sumala sa mga opisyal, ang partial withdrawal usa ka precautionary measure, ug gilauman nga adunay usab UK personnel nga kuhaon. Ang gobyerno sa Qatar mingbutyag nga ang lakang tubag sa regional tensions, samtang si Trump nagpasidaan nga maghimo og “very strong action” kung ipatuman sa Iran ang pag-execute sa mga demonstrador.
Samtang mingbahad usab ang Iran nga mosukol kini kung atakihon sa US ug mipasi-daan nga ang mga base ug shipping centers mahimong target.
Gipasiugda sa Qatar nga magpadayon kini sa pagpatuman sa tanang lakang aron maprotektahan ang seguridad ug kaluwasan sa mga lungsoranon, samtang nagpabilin nga dili klaro kung pila ka personnel ang kuhaon sa pinakadako nga US military base sa Middle East nga adunay kapin 10,000 ka sundalo ug 100 ka UK staff.
