Gideklarar sa panggamhanan sa Dakbayan sa Sugbo ang “State of Calamity” sa intero syudad nunot sa pagkabalda sa koleksyon sa basura human sa nahitabong Binaliw landfill landslide niadtong Enero 8.
Sumala ni Cebu City Councilor Dave Tumulak, kinsa Chairman sa Cebu City Disaster Risk Reduction and Management Council (CCDRRMC) nga gidiklara na nila ang maong deklarasyon tungod sa nabaldang operasyon sa pagpangolekta sa basura ug mismong ang insidente niadtong Enero 8 sa landfill landslide.
Gipasalamatan usab sa Konsehal ang Barangay Polog, Consolacion sa pagdawat sa kasabutang temporaryong maglabay ang dakbayan sa nakolektang basura– sulod sa 30 ka adlaw, samtang gilatid pa ang permanenteng solusyon sa giabagang problema sa syudad sa waste management kansa nakahatag og hulga sa pampublikong panglawas.
Gani niadtong Enero 12 ming-isyu na ang Department of Environment and Natural Resources – Central Visayas (DENR-7) og cease-and-desist order batok sa Prime Integrated Waste Solutions, Inc. sa tigdumala sa maong pasilidad.
Ang sugyot sa deklarasyon nga state of calamity, bunga sa joint resolution nga giduso nila ni Konsehal Tumulak ug Cebu City Councilor – North District Joel Garganera atol sa online regular session sa Cebu City Council niadtong Martes, Enero 13, 2026 diin ilang gihulagway nga “grave and tragic incident” nga miresulta sa kamatayon, pagkaangol, pagkawala ug seryosong hulga sa pampublikong panglawas ug sa kinaiyahan.
Subay sa maong deklarasyon, nagtugot kini sa pagpagawas og P30-milyones gikan sa calamity fund sa City government diin gawas sa Binaliw, maapuran usab ang mga biktima sa sunog sa Barangay Tejero sa nakalabayng semana.
Samtang sa pikas bahin sa susamang sesyon sa konseho, mingduso usab si Kagawad Garganera og corollary motion kansa nagdeklarar sa Enero 16, 2026 isip “Day of Mourning” o Adlaw sa Pagbangutan isip paghandum sa pagkawala sa mga biktima sa makalilisang nga panghitabo.
