BUTUAN CITY — Gipangulohan ni Police Brigadier General Marcial Mariano Magistrado III, Regional Director sa Police Regional Office 13 kon PRO13, ang Blessing ug Turnover Ceremony sa bag-ong nakuhang police assets nga gipahigayon sa PRO13 Grandstand, Camp Col. Rafael C. Rodriguez, Libertad, Butuan City.
Sa maong seremonya, pormal nga giturn-over ang 12 ka unit nga Personnel Carrier 4×4 (Toyota Hilux) ug usa ka Light Transport Vehicle (Toyota Innova) kansa gilauman nga makapadugang sa mobilidad sa kapulisan. Dugang pa niini, pito ka unit sa MERTSAV Light Machine Guns (LMG) ug 200 ka unit sa KAVRO Enhanced Combat Helmets aron mas lig-on ang taktikal nga kapasidad ug masiguro ang kaluwasan sa mga personahe sa PRO13 sa ilang pagpatuman sa balaod, kaluwasan sa publiko, ug operasyon sa disaster response.
Sa iyang mensahe, gibutyag ni PBGEN Magistrado III, nga dili mahuman sa turnover ang responsibilidad sa kapulisan. “Ang tinuod nga obligasyon anaa sa mga end-users aron masiguro ang hustong pagmintinar ug pag-atiman sa mga assets. Hinumdumi kanunay, nga ang Public Office usa ka public trust,” matod pa niini.
Pormal nga gidawat usab sa mga Provincial Directors ug Chiefs of Police ang mga kabtangan, kauban ang sa ilang Supply Accountable Officers aron masiguro ang tukmang dokumentasyon.
Gipasiugda usab ni PBGEN Magistrado nga ang padayon nga pagpalit sa modernong sakyanan, armas, ug protective equipment nagpakita sa tinuod nga komitment sa Philippine National Police sa pagpalig-on sa operational readiness ug sa pagpanalipod sa kaluwasan sa mga personahe.
Ang bag-ong mga sakyanan gilauman nga makapadugang sa kusog sa police mobility ug response capability sa rehiyon, samtang ang dugang nga armas ug combat helmets maghatag ug mas lig-on nga proteksyon sa mga personahe ilabi na sa kritikal ug high-risk nga mga misyon, isip padayon nga pagserbisyo ug pagpanalipod sa komunidad.
