Bluefin tuna nga mi-abot sa 243-kilos, nahalin sa og dul-an ₱186-M

BUTUAN CITY – Nahalin sa kantidad nga $3.2-M kon bugti sa dul-an 186-milyunes pisos ang usa ka bluefin tuna sa auction nga gihimo sa Tokyo, Japan.

Ang midaog nga isda adunay gibug-aton nga 243-kilo nga napalit sa Kiyomura Corporation, ang sikat nga operator sa mga restawran sa Japan.

Natingala si Kiyoshi Kimura, ang presidente sa maong kompanya, nga miabot sa maong gibug-aton ang isda hinungdan sa kamahal usab sa presyo niini.

Madumdumang niadtong tuig 2019, nakapalit usab siya og bluefin tuna sa kantidad nga $2.1 milyon, ingon man niadtong 2012 ug 2013 diin siya usab ang midaog sa bidding.

Nasayrang matag tuig, daghang tawo ang mu-adto sa Toyosu fish market sa Tokyo nga namaligya og mga talagsaon ug mahalon nga matang sa mga isda.