BUTUAN CITY – Gibulgar ni Senate President Pro Tempore Panfilo “Ping” Lacson nga base sa mga dokumentong gikan kang kanhi Public Works Undersecretary Maria Catalina Cabral ug sa Department of Public Works and Highways kon DPWH, lima ka miyembro sa gabinete ug pipila ka undersecretaries ang nakadawat matud pa og bilyones pisos nga pondo sa allocables ug non-allocables alang sa 2025 national budget.
Sigon sa senador, usa ka opisyal nga gitawag lang og “ES” nakadawat matud pa og ₱8.3 bilyon samtang si kanhi DPWH Secretary Manuel Bonoan adunay ₱30.5 bilyon.
Gikwestyon usab ni Lacson, kung nganong nakadawat og allocables ang mga cabinet members diin kasagaran alang lang matud pa sa mga magbabablaod, dayong butyag nga ang maong pundo kabahin sa unprogrammed appropriations diin ₱30 bilyon ang gi-allocate alang sa mga flood control projects kansa kadaghanan nakumpirmang mga “ghost projects”.
Dugang pa niini, nga ang mga Special Allotment Release Orders kon SAROs nga gipetsahan og Disyembre 27, 2024 naglangkob og ₱50 bilyon diin gilauman nga susihon sa Senate Blue Ribbon Committee.
