BUTUAN CITY – Gikumpirma ni Kagawad Alfredo Ampo sa Brgy Holy Redeemer ning siyudad sa Butuan nga mi-abot sa 36 ka mga pamilya kon bugti sa 120 ka mga indidbidwal ang nawad-an og pinuy-anan sa Purok 3-A human ang dakong sunog kagabii atol sa Pasko.
Sa eksklusibong pakighinabi sa Bombo Radyo Butuan, gipadayag sa opisyal nga natunulan na sila og mga ayuda ug padayon gihapon ang pag-assist sa barangay council ngadto nila ilabina kadtong anaa temporaryong nagpuyo sa ilang covered court.
Sigon sa opisyal, base sa ilang inisyal nga pakisusi, gikan matud pa sa mibuto nga gasul nagsugod ang sunog kansa paspas nga misilaob rason sa kadaghan sa mga nasunugan. Apil sa ilang giplastar ang mahimong kabalhinan sa mga nasunugan ilabina nga matag-adlaw gamiton ang ilang covered court.
Samtang tumang kasubo usab ang gibati sa ginang nga si Mary Jane Basco tungod kay bisan sinina, wala sila’y nabitbit tungod kay ang iyang gi-una mao ang pagluwas sa upat niya ka mga anak.
Ang iyang giproblema karon unsaon na ang pagpa-eskwela sa mga anak nga anaa na sa kolehiyo ang usa, senior high ang usa ug elementarya ang duha.
Nanghinaut na lang siya nga unta matabangan sila sa city government nga makapatukod og bag-o nilang kapuy-an.
