BUTUAN CITY – Gikumpirma ni United States President Donald Trump nga naglusad ang Estados Unidos og usa ka kusog ug makamatay nga pag-atake batok sa grupong Islamic State (IS) sa amihanang-kasadpang bahin sa Nigeria.
Gitawag ni Trump ang IS nga mga teroristang walay pulos, ug iyang gipasanginlan ang grupo sa pag-target ug pintas nga pagpatay, ilabina sa mga inosenteng Kristiyano.
Sumala ni Trump, ang militar sa US nakahimo og daghang hingpit nga mga pag-atake, samtang gi-report sa US Africa Command (Africom) nga ang pag-atake gihimo uban sa koordinasyon sa gobyerno sa Nigeria sa Sokoto state.
Sigon ni Nigerian Foreign Minister Yusuf Maitama Tuggar, usa kini ka “joint operation” nga nagtumong sa mga terorista ug wala kini’y kalabutan sa bisan unsang partikular nga relihiyon.
Bisan wala niya hinganli ang IS, gibutyag ni Tuggar nga dugay na kining giplano nga operasyon ug migamit og intelligence information nga gihatag sa bahin sa Nigeria.
Wala usab gisalikway sa ministro ang posibilidad sa dugang pang mga pag-atake, ug magdepende kini sa mga desisyon nga buhaton sa kadumalahan sa duha ka nasud.
