BUTUAN CITY – Nakatala ang Philippine Institute of Volcanology and Seismology (PHIVOLCS) og 195 ka linog sa palibot sa Claveria, Masbate gikan sa alas 9:22 sa buntag hangtod alas-3:00 kagahapon sa hapon sa bisperas sa Pasko.
Sumala sa PHIVOLCS, 17 ka linog ang adunay kusog nga magnitude 1.8 hangtod 3.1 ug giladmon nga 3 hangtod 21 kilometro apan bisan pa man sa kadaghan sa mga natala nga linog, wala’y bisan usa niini ang gi-report nga nabati sa mga residente.
Pagkagabii, usa ka tectonic earthquake nga magnitude 1.9 ang natala pag-usab bandang alas 11:08 sa gabii, apan wala usab kini nagmugna og kadaut o mga aftershock.
Sumala sa PHIVOLCS, ang Masbate kabahin sa Philippine Fault Zone, busa natural lamang ang kanunay nga seismic activity sa maong rehiyon.
Ang sunod-sunod nga mahuyang nga mga linog gitawag og earthquake swarm, nga nagpakita sa padayon nga paglihok sa fault system.
Padayon ang pag-monitor sa PHIVOLCS ug nagpahimangno sa publiko nga magpabiling alerto ug andam sa bisan unsang posibleng mas kusog nga paglinog.
