BUTUAN CITY – Gipadayag ni Pangulong Ferdinand ‘Bongbong’ Marcos Jr nga maayo ang iyang mental health ingon man ang iyang kinatibuk-ang well-being ug dili matud pa maratol kung duna’y dakong problemang mu-abot.
Gipadayag sa pangulo nga nakatabang ang taud-taud niyang pag-obserba sa trabaho sa iyang amahang si Ferdinand Sr dihang nangatungdanan kini pagka-presidente sa nasud.
Dugay na matud pa niyang gipuy-an ang sakripisyong kaluha sa maong posisyon dayong butyag nga importante ang pag-relax gikan sa trabaho bisan og pila lang ka oras aron masiguro ang epektibong panghuna-una alang sa limpyong trabaho.
Nahimo na matud pa niyang routine ang pag-ehersisyo isip pangpawala sa iyang stress.
Aminado usab ang pangulo nga dili siya matarantar kung duna’y mu-abot nga dakong problema dayong butyag nga ang naghatag kaniya og kadasig alang sa padayong pagdumala sa nasud mao ang pagserbisyo sa katawhang Filipino ug dili matud pa ang personal nga interest.
Bisan matud pa niadtong batan-on pa siya, wala siya’y ganang musulod sa pulitika tungod sa kahago base na sa iyang na-obserbahan, apan sa ngadto-ngadto inanay na niya kining gi-adopt rason sa iya karong na-abot nga utang usab matud pa niya sa iyang mga ginikanan.
