BUTUAN CITY – Dungan sa pag-apil sa Bangon Sambayanan People’s Movement ka-uban ang Marcos Resign Movement, Marcos Alis Jan Network ug Muslim Christian Alliance of the Philippines sa EDSA Shrine junction niadtong Dominggo, giklaro ni Bangon Sambayanan Secretary General Jeffery “Ka Eric” Celiz, nga wala misupporta ang ilang grupo sa panawagan sa simbahang Katoliko nga ipabilin sa pwesto si Pangulong Ferdinand Marcos Jr. tungod kay siya matud pa ang mastermind sa anomalya sa mga flood control projects.
Sigon ni Celiz, ang rally sa simbahang Katoliko gisakyan sa mga political operators nga konektado sa Liberal Party ug Akbayan sama sa Yellow ug Pink political operators nga ming-uyon sa panawagan nga mag-resign si Vice President Sara Duterte.
Kini taliwa nga wala’y kalabutan ang Bise Presidente sa 1-trillion peso scandal. Gani, gitumbok ni Celiz nga si President Marcos mao ang nagpatuman ug nagpondo sa kapin 4,000 ka mga flood control projects ug gitumbok pa ni Kanhi Congressman Zaldy Co nga mastermind sa maong kontrobersiya.
Dugang pa ni Ka Eric, dili madawat sa ilang grupo ang paningkamot sa simbahang Katoliko nga ilaron ang katawhan, inay nga kondenahon ang korapsyon ug pangurakot.
Gidugang pa niini nga kinahanglan nga klaro ug tukma ang panawagan aron masuta ang tinuod nga accountability ug transparency ug dili kay limpyuhan gikan sa maong isyu ang presidente.
Gipasabot ni Celiz, nga kini ang hinungdan nga wala sila nakighi-usa sa People Power Monument tungod kay tumong niini mao ang pag-atake kang Bise Presidente Sara Duterte nga dili mao ang problema sa nasud kondili ang sindikato sa administrasyong Marcos.
Sa Luneta, giila ni Celiz nga mga komunista ang nagdumala sa protesta pinaagi sa mga kanhi organisasyon sama sa Bagong Alyansang Makabayan, Bayan Muna ug uban pang mga communist-led urban poor organizations.
