BUTUAN CITY – Andam na ang Independent Commission for Infrastructure kon ICI alang sa pag-livestream na sa ilang mga pagdungog kalabot sa mga anumalusong flood control projects.
Sumala sa ICI spokesperson Atty Brian Keith Hosaka, andam na sila sa teknikal nga bahin sa livestreaming nga mahimong buhaton kung ang resource person nga mutestigo mosugot nga ipakita sa publiko ang iyang testimonya.
Gi-anunsyo usab sa opisyal ang default setting sa tanang hearings pinaagi sa YouTube ug Facebook, gawas lang kung adunay request alang sa executive session.
Kung muhangyo matud pa og executive session ang resource person, kinahanglang balido ang rason niini ug nasulod sa guidelines sa komisyon.
Aminado si Hosaka nga dugay-dugay ang ilang pagtuon sa guidelines aron masiguro nga nasubay kini sa nagtunhay nga balaud ingon man sa jurisprudence ug pronouncements sa Korte Suprema.
Mag-anunsyo matud pa sila kung kinsa ang mga resource person nga imbitado nila sa itakda nilang mga pagdungog.
Nasayrang gi-release na ang guidelines sa alang livestreaming, nga nagdili sa selective coverage ug nagkinahanglan nga justified ang mga request alang sa closed-door sessions.
