BUTUAN CITY – Gikumpirma ni Agusan del Norte provincial board member Erwin Dano nga duna na’y mga hingtungdang in-charge sa Provincial Environment and Natural Resources Office ang gi-relieve una sa ilang pwesto.
Kini samtang nagpadayon pa ang imbestigasyon sa Provincial Management and Regulatory Board kalabot sa nabulabog nga illegal gold mining operations sa Sitio Mantigue, Barangay Poblacion 1, lungsod sa Santiago.
Sa eksklusibong pakighinabi sa Bombo Radyo Butuan, gibutyag ni provincial board member Erwin Dano, chairman sa Committee on Information sa Sangguniang Panlalawigan, naghulat na lang sila og official report gikan sa board aron makahimo na og tukmang lakang batuk sa mga angayang silutan.
Giklaro usab sa opisyal nga wala’y permit ang maong operasyon rason nga hugot nila kining gikondena dungan sa pagbutyag nga dili bukid ang mining site kondili riverbed lang nga alang unta sa quarrying operations.
