BUTUAN CITY – Gipatuman na sa Department of Trade and Industry kon DTI-Caraga ang price freeze sa tanan nga mga batakang palaliton sa Dinagat Islands province human kini gipa-ilalom sa state of calamity kagahapon tungod sa dakong kadaut nga hatud sa bagyong Tino.
Sigon ni Atty Carmela Guibone, officer-in-charge sa Consumer Protection Division sa maong regional department, epektibo ang price freeze sulod sa duha ka buwan o hangtud nga tangtangon na ang state of calamity.
Tungod niini, sugod na usab ang ilang kada-adlaw nga monitoring sa presyo sa mga batakang palaliton sa nasangpit nga lalawigan sulod sa maong panahon.
Makig-alayon usab sila sa mga local government units sa nasangpit nga lalawigan aron mas dali ang monitoring ug ang pag-aksyon sa mga tindahan nga magpahimulos sa mga konsumidor pinaagi sa pagpataas sa presyo sa ilang mga gibaligyang produkto.
