BUTUAN CITY – Target istoryahon sa mga opisyal ug mga miyembro sa Butuan Bajaj Operators and Drivers Association kon BUBODA si Mayor Lawrence Lemuel Fortun aron ihatag na kanila ang dugay na nilang hangyo nga legal nga makabiyahe sa rutang Butuan City hangtud sa Brgy Tungao ug dili kay basta-basta na lang wagtangon ang ilang dugay nang ruta nga gibiyahian.
Kini human gimando matud pa ni City Transportation and Traffic Management Department kon CTTMD head Ma Kristina Cassion ang pagpadakop kanila tungod sa kolorum nilang operasyon.
Sigon ni BUBODA President June Torres, tuig 2017 pa sila nagsugod pagbiyahe kondiin sa pagkakaron, duna na sila’y 150 ka mga membro.
Ang tanan matud pang gikinahanglang dokumento apil na ang barangay resolution sa may Brgy JP Rizal diin sila nag-terminal, apil sa ilang gipasa panahon pa sa mi-aging mga administrasyon apan wala gihapon sila hatagi og pagtagad.
Gusto matud pa nilang legal nga manginabuhi rason sa padayon nilang pag-lobby nga tugutan silang makapamasada apan wala sila gipaminaw sa city government.
Andam matud pa silang muhawa sa maong barangay basta ila lang mapa-abot kang Mayor Law ang dugay na nilang sentimiento.
Andam usab nilang pakigbisugan ang ilang katungod nga legal nga makapamasayro gikan sa may Purok 8, Brgy JP Rizal diin sila nag-terminal ngadto na sa Brgy Tungao ning siyudad.
Sigon sa membrong si Jun Elopre, taga-Brgy Dulag, tuig 2017 pa sila nagsugod og biyahe aron maserbisyuhan ang katawhan sa maong barangay ilabina ang mga estudyante nga wala na’y masakyan panahon sa kagabhi-on.
Samtang sa isyung dako ang ilang pangayuong plite panahon sa kagabhi-on, giklaro ni Elopre nga ang muhimo niini kadtong mga namasayro nga dili nila membro rason nga mapugos na lang pagsakay ang mga pasahero aron lang maka-uli.
Gipadayag usab sa laing driver nga si Marlo Cassion nga bisan og gusto nila nga legal nga makapamasada, apan tungod kay wala gayod aksyuni sa city government ang ilang hagyo, rason nga nahulog gayod nga ilegal ang ilang operasyon.
Tungod niini, hangyo nila sa city government nga unta tabangan sila nga makapamasada sa legal nga paagi.
Mahimo matud pa silang itipon sa laing ruta ilabina nga daghan na silang mga membro sa ingon dili mahunong ang ilang panginabuhian.
