BUTUAN CITY – Gikumpirma ni Kapitan Sergio Manlumabe, sa Brgy. Mahayahay, lungsod sa San Luis, Agusan del Sur nga unom ka mga tawo ang gitu-uhang natabunan sa dakong pagdahili sa bukirang bahin sa Km 31, Sitio Tagbulacan, sa maong barangay.
Sa iyang pagsaysay, duna matud pa’y magti-ayon nga mag-ulingay sa maong dapit uban sa ilang usa ka apo nga apil sa natabunan sa midahiling yuta ug lapok, uban sa usa ka driver sa motorsiklo, ingon man driver ug pahinante sa usa ka Saddam truck.
Gidugang pa niini nga pasado alas-6:30 kagabii, duna ka Saddam truck ang misubida sa maong lugar kondiin pag-abot nila sa tulay nga bahin, duna na’y nagbabag nga punuan sa kahoy nga maoy gitabangan pagkuha sa driver ug pahinante aron sila maka-agi ug didto na midahili ang halos katunga nga parte sa bukid duol sa tulay.
Sa nagpadayong rescue operation, narekober ang patay’ng lawas nila Jonard Gonzales, driver sa Saddam truck ug ang 3-anyos nga batang si John Paul Abunda.
Samtang padayon pang gipangita ang apuhan sa bata nga sila Helen ug Gerry Abunda, ingon man ang driver sa motorsiklong magkuha lang unta og bugas ug ang kargador.
