BUTUAN CITY – Gi-anunsyo ni United States President Donald Trump sa social media account niini nga kunhoran sa Estados Unidos ang ipatong nga taripa sa Pilipinas ngadto sa 19% gikan sa 20%, apan ang US, mag-adaptar sa open market sa Pilipinas, pasabot nga walay taripa nga ipatung sa tanan nilang produkto nga mu-abot dinhi sa nasod.
Sigon ni Trump, ang bugtong gihisgutan nila Pangulong Ferdinand Marcos Jr sa ilang panagkita sa White House mao ang dagkong trade deal dungan sa pagbutyag nga maayo matud pang negosyador ang presidente sa Pilipinas, kondiin mga dagkong negosyo ang sudlan sa duha ka nasud karong tuiga, nga mahimong mulambo pa pinaagi sa himoon nilang mga trade deals.
Nasayrang niadtong 2024, mas daghan ang gi-import sa US gikan sa Pilipinas kung itandi sa gi-export niini, kansa miresulta sa $5 billion gikan sa kinatibuk-ang $23.5 billion alang sa two-way trade, rason nga gipatas-an ni Trump ang taripa gikan sa mga imported goods nga gikan sa Pilipinas gikan sa 17% aron mahimong reciprocal ang binayloay sa nasod og mga produkto.
Samtang gipasigarbo usab ni Pangulong Marcos ang kasuod sa Pilipinas sa Estados Unidos sukad pa sa nakalabayng mga katuigan.
Subay usab sa pangutana mahitungod sa reciprocal tariffs nga gipatung ni Trump, gipadayag ni Marcos nga uban sa liderato ni Trump, kampante siyang makab-ot ang tanang tinguha sa trade deal.
Dungan niini ang pag-ila niya sa Estados Unidos isip pinakamasaligang partner sa Pilipinas.
Nasayrang si Pangulong Marcos pa ang pinaka-unang Southeast Asian leader nga nakigkita kang Trump sa ikaduha niining Termino.
