BUTUAN CITY – Gipadayag ni Palace Press Officer Claire Castro nga dili na kinahanglang tubagon sa Malacañang ang panawagan ni Senador Imee Marcos nga klaruhon ang nabaniog nga kutay ni First Lady Liza Araneta Marcos ngadto sa kamatayon sa Filipino business executive nga si Paolo Tantoco didto sa Estados Unidos.
Una nang nabaniog nga kabahin si Paolo Tantoco, sa iyang official entourage dayong butyag nga “fake news” kini ug gigamit lang sa ilang mga kaaway sa pulitika.
Sigon ni Presidential Communications Office (PCO) Undersecretary Claire Castro, duna’y bahid sa pulitika nga nagkutay sa First Lady ngadto sa gika-ingong cocaine overdose ni Tantoco nga mao matud pa’y hinungdan sa iyang kamatayon.
Sigon ni Castro, makasusubo matud pa nga ang mga pribadong indibidwal nga nagsubo tungod sa maong panghitabo, mabira sa pulitika aron lang dauton ang First Lady, ang Presidente ug ang administrasyon kansa maka-uulaw matud pa.
Nasayrang base sa imbestigasyon sa mga otoridad sa United States, migawas sa mga media reports nga ang cocaine overdose matud pa ang hinungdan sa kamatayon ni Tantoco.
Mikaylap karon sa social media ang gika-ingong police report nga nagdamay sa mga indibidwal sulod sa First Lady’s circle hinungdan sa nanggawas nga mga pangutana gikan sa mga kritiko apil na ni Sen. Imee Marcos, kinsa nanawagan nga ipagawas na sa Malakanyang ang kinatibuk-ang Palace report aron mawala ang espekulasyon sa mga tawo.
Sigon ni Castro, pabiling wala matarog ang first lady sa maong mga akusasyon.
