BUTUAN CITY – Padayon pang gi-verify ang taho nga duha ka mga minero ang gika-ingong nakalas human nahugmak ang ilang gitrabahuang Kamagtong tunnel sa Purok 5, Sitio Hagumitan, Brgy. Bolhoon, lungsod sa San Miguel Surigao del Sur.
Sa pagkutlo niini nga balita, padayon pang gipaningkamutan sa mga ka-ubanang minero uban sa mga barangay officials ug mga rescuers nga mapanaog ang gika-ingong duha ka namatay nga minero human nga ang usa nila ka ka-uban nga duna pa’y kinabujhi, malampusong napanaog gikan sa bukid.
Kini na ang ikaduhang insidente nga gilambigitan sa minahan sulod lang ning buwan sa Hulyo sunod sa unang nahitabo sa Sitio Cosep, Purok 11 Barangay Bayugan 3, Rosario, Agusan del Sur sa niadtong Hulyo 3 nga mikalas sa upat ka mga illegal small-scale miners human nabahaan ang tunnel nga ilang gitrabahuan.
