BUTUAN CITY – Balik-eskwela na sa normal ang klase sa duha ka mga elementary schools ug duha ka mga day care centers sa Brgy. Pianing ning siyudad sa Butuan human ang duha ka hugna sa engkwentro niadtong Lunes sa buntag nga mikalas sa kinabuhi sa usa ka rebeldeng New People’s Army kon NPA.
Una nang gibutyag ni 1st LT Rolando Baodo, tigpamaba sa 29th Infantry Battalion, Philippine Army, nagsugod ang unang engkwentro pasado alas-5:20 sa buntag nga milungtad og dos-minutos nga gisundan sa alas-7:30 sa buntag.
Sa ikaduhang engkwentro na napalgan ang patay’ng lawas ni Ruel Niniel alyas Jacob, residente ng Brgy. Diatagon, lungsod sa Lianga, Surigao del Sur kinsa opisyal sa Regional Headquarters sa North Eastern Mindanao Committee sa NPA.
Narekober sa encounter site ang duha ka mga high-powered firearms, usa ka bandolier, mga subersibong dokumento, ug usa ka cellphone.
Samtang gibutyag ni Kagawad Al Binongo nga tungod sa engkwentro sa Sitio Amor kansa ibabaw lang sa tunghaan sa elementarya ug dihang nasundan kini pagka alas-7:30 sa buntag, nagdeklara gilayon ang duha ka mga elementaryang tunghaan ug duha ka day care centers nga wala’y klase alang sa kaluwasan sa tanan.
Gibalik na kaganinang buntag ang klase human gideklara sa kasundaluhan nga kontrolado na nila ang sitwasyon.
Samtang gipadayag usab sa residenteng si Christopher Patente nga pasado alas-nueve na sa buntag napanaog ang patay’ng lawas sa rebelde nga gikarga sa duyan ug gipakita kanila sa pangindahay nga ila kining na-ilhan.
