BUTUAN CITY – Nagkita ug naggaksanay na ang mag-amahang kanhi Pangulong Rodrigo Duterte ug Davao City 1st District Congressman Paolo ‘Pulong’ Duterte human nga nabisita na sa batang Duterte ang iyang amahan sulod sa detention facility sa International Criminal Court kon ICC sa The Hague, Netherlands.
Sa iyang pag-atubang sa mga Pinoy nga anaa kada-adlaw sa Duterte’s Park, dako ang pagpasalamat sa kongresista sa wala’y puas nga panagtapok sa ilang mga supporters ilabina niadtong pabiling mituo sa iyang amahan.
Kini ilabina dihang nadungog mismo ni Congressman Pulong ang pamahayag sa mga overseas Filipino workers kon OFWs nga dili sila sum-ulan nga magtapok kada-adlaw sa maong parke hangtud nga madala og balik dinhi sa nasud ang kanhi presidente.
Samtang pasi-aw pa sa kongresista, nakagakos na niya og hugot ang iyang amahan nga sa iyang nadumduman, ikalima ka higayon pa kini sa ilang duha.
Aminado usab siyang mas close karon ang ilang pamilya sa nahitabo sa ilang amahan dayong pasalig nga wala’y angayang kabalak-an ang tanan, tungod kay gi-atiman og maayo sa taga-ICC ang iyang amahan.
