BUTUAN CITY – Paningkamutan ni Senate Foreign Affairs Committee chairman Senadora Imee Marcos nga muhimo og lain pang pagdungog subay sa pagpa-aresto sa administrasyon sa iyang manghod nga si Pangulong Ferdinand Marcos Jr., kang kanhi Pangulong Rodrigo Duterte.
Kini tungod na usab sa hangyo sa iyang mga ka-ubanang senador sa rasong daghan pang angayang silibon ug piga-on gikan sa nanggawas nga mga detalye sa mi-aging imbestigasyon nga wala pa maklaro.
Apil na niini ang eroplano nga naghatud sa kanhi pangulo padulong sa The Hague, Netherlands kansa wala pa matumbok ang tag-iya niini ug uban pang detalye nga kinahanglang mabulgar.
Sigon sa senadora, ang impormasyong ning mi-aging tuig pa nakasulod sa nasud ang mga sakop, imbestigador, abogado ug security experts sa International Criminal Court kon ICC. Kini sukwahi sa gipasi-atab sa mga government agencies sama sa Philippine National Police kon PNP nga bag-o lang gipadakop sa ICC ang kanhi pangulo.
Gipamugos sa senadora, bisan og gusto niyang muhimo og lain pang pagdungog, dili niya kini mahimo tungod kay wala pa siya’y na-imbitar nga testigong mukumpirma sa maong impormasyon.
