BUTUAN CITY – Gihangyo karon sa kampo ni Veronica ‘Kitty’ Duterte, anak ni kanhi Pangulong Rodrigo Roa Duterte nga magtakda ang Korte Suprema og oral arguments alang sa ilang gisubmiteng petisyon nga habeas corpus alang sa kanhi pangulo.
Gipadayag ni Atty. Salvador Panelo, nagduso na ang iyang law firm og mosyon aron hangyuon ang usa ka legal debate sa pinakataas nga hukom.
Importante matud pa ang ingon niini nga lakag aron mahatagan og dalan nga masusi og maayo sa Supreme Court ang mga legal ug constitutional issues nga nakalatid sa ilang petisyon.
Importante matud pa ang oral arguments tungod kay mas transparent ug dali pang masabtan sa publiko ang maong isyu. Dili matud pa kini angayang isalindot tungod kay ang mahimong resulta sa pagdungog o mahimong resolusyon kalabot niini, gi-atangan sa publiko.
Nakalatid sa ilang gisubmiteng mosyon nga matuki sa oral arguments ang pangutana kung mahimo bang mulikay ang Ehekutibo sa tulubagon niini sa writ of habeas corpus sa Korte Suprema kung ang usa ka indibidwal, nadetine na gawas sa nasud.
