BUTUAN CITY – Padalhan og subpoena ni Senadora Imee Marcos ang tanang mga resource persons nga wala mutambong sa gipatawag nga ikaduhang pagdungog sa Senate Committee on Foreign Relations nga iyang gipangunahan.
Tungod kay wala’y mutubag sa mga gi-andam nilang pangutana, gipadayag sa senadora nga pirma na lang ni Senate President Chiz Escudero ang kulang aron ipadala na ang maong mga subpoena.
Apil sa padalhan niini angmanagsuong sila Justice Sec. Jesus Crispin Remulla ug Interior and Local Government Sec. Junvic Remulla, Executive Sec Lucas Bersamin; National Security Adviser Eduardo Año; Defense Secretary Gilberto Teodoro Jr.; Foreign Affairs Secretary Enrique Manalo; ug Migrant Workers Secretary Hans Cacdac.
Wala usab mutunga sila Philippine National Police chief Rommel Marbil; Criminal Investigation and Detection Group director Police Maj. Gen. Nicolas Torre III; Phil Air Force chief Lt. Gen. Arthur Cordura; ug retired general Anthony Alcantara, ang executive director sa Philippine Center on Transnational Crime.
Sigon ni Senadora Marcos, kinahanglan matud pang mapakita sa Senado ngadto sa katawhan ang ilang ka-isog nga mubarog alang sa katawhan.
Gitawag pa niining talawan ang wala nanunga nga mga opisyal nga maoy nagtinabangay aron lang mapadala ang masakiton na nga kanhi pangulo ngadto sa gi-andam na matud pa nilang prisuhan.
Gihagit pa niini si Executive Secretary Lucas Bersamin nga dili magtinalawan ug ipa-atubang sa Senado ang iyang gitapin-an nga mga opisyal sa kagamhanan.
