BUTUAN CITY – Nabutang karon sa alanganin ang gobyerno sa Pilipinas, sa giduso nga petition for writ of habeas corpus sa mga anak ni kanhi Pangulong Rodrigo Duterte nga sila Sebastian ug Veronica Duterte ngadto sa Korte Suprema, subay sa pagpadakop sa ilang amahan dayong hangyo nga, mabalik kini dinhi sa nasud.
Sa eksklusibong pakighinabi sa Bombo Radyo Butuan, gipadayag ni Judge Emmanuel Escatron, kanhi executive judge sa Regional Trial Court sa Butuan City, nga ang pagpanghunaw sa Office of the Solicitor General kon OSG kansa maoy abogado sa gobyerno, sa gihimong aksyon sa administrasyong Marcos nga maoy gikwestyon sa petisyon, mao ang magbutang kanila sa alanganin.
Kini tungod kay kaniadto pa, gipahibalo nang daan sa OSG panahon ni kanhi Pangulong Duterte, nga wala na’y hurisdikyon ang International Criminal Court kon ICC dinhi sa Pilipinas tungod sa pagbiya na niini niadtong tuig 2016.
Ang pagpanghunaw matud pa sa Office of the Secretary General sa maong petisyon, nagtimaan lang nga gibarugan nila ang ilang gipadayag kaniadto nga wala’y huridiksyon ang ICC sa Pilipinas.
Gawas niini, dakong kwestyon usab ang wala pagdala sa mga otoridad sa kanhi pangulo ngadto sa competent judicial authority kon sa bisan asa nga korte dihang kini gisikop tungod kay gipadiretso kini og sakay sa abyon padulong sa The Netherlands kansa wala magsunod sa proseso.
Sa mga instances matud pa nga duna’y kalibog sa international community sa ingon niini nga sitwasyon, ang mupatigbabaw mao gayod ang balaud sa Pilipinas.
