BUTUAN CITY – Walay nakitang foul play ang kapulisan sa patay’ng lawas nga nakaplagan nalang nga naglutaw-lutaw sa boulevard sa dakbayan sa Surigao kagahapong adlawa.
Giila ni Police Lt Col. Mariano Lukban, hepe sa Surigao City Police Station ang namatay nga si Angelita Malunas Ruiz, 30-anyos, dalaga nga taga Barangay Taft, Surigao city.
Sumala pa niini nga bandang alas 5:30 sa buntag sa dihang dunay nagpatala sa kapulisan nga pag-omangkon sa biktima diin gibutyag niining 10 ka tuig nang dunay problema sa pangisip ang biktima rasong sa paglakaw-lakaw niini bisan asa.
Natingala na lang matud pa sila nga na-post na sa social media ang kamatayon sa iyang iyaan.
Posible matud pa nga niadtong higayon milangoy kini og tungod sa dagko nga mga balod rasong wala na nakahaw-as pa.
Sa karun giplastar na ang patay’ng lawas niini sa usa ka punerarya sa Barangay Washington, Surigao City human usab na-claim sa iyang pamilya.
Nasayrang nakit-an pa sa usa ka Jomel Laurente, 27 anyos ang maong biktima nga nangayo og tabang, apan sa pagresponde sa Philippine Coast Guard Surigao City Substation wala nay kinabuhi kini nilang nakuha diin nag lisod pa sila paghaw-as niini tungod sa kusog nga sulog ug dagkong balod.
