BUTUAN CITY – Malampusong naluwas sa City Disaster Risk Reduction and Management Office kon CDRRMO sa Surigao City ang tulo ka mga hamtong ug usa ka minor-de-edad human mitiklaob ang ilang gisakyang motorbanca kagahapon human mibiya sa Brgy. San Juan ug padulong unta sa Brgy. Alegria sa maong siyudad.
Nasayrang daling gi-deploy sa emergency teams ang mga ambulansya, usa ka rescue vehicle, ug usa ka speedboat alang sa daling paghatag og first aid sa mga naluwas samtang ang mitiklaob nga pump boat, giguyod na padulong ngadto sa Nueva Basin.
Gikumpirma sa mga rescuers nga wala’y nakalas sa maong hitabo apan nakasinati ang naluwas nga minor-de-edad og mild hypothermia ug gidala na ang tanang mga naluwas ngadto sa Caraga Regional Hospital alang sa medical assessment.
