BUTUAN CITY – Gipamatud-an ni Joshua Pacio gikan sa Pilipinas, nga kini ang hari sa strawweight division alang human malampuson nga nadepensahan ang iyang bakus sa bag-ohay lang natapos sa ONE Mixed Martial Arts kon MMA Strawweight world title unification fight batuk kang Jarred Brooks nga gipahigayon sa Lusail Sports Arena sa Doha, Qatar.
Ang maong dula mao na ang ikatulong panag-agbat sa duruha diin sa unang away, nailog ni Brooks ang bakus gikan kang Pacia samtang sa ilang rematch subli kining nakuha ni Pacio human na-disqualify si Brooks.
Sa unang round pa lang sa away kaganina, gipakita ni Brooks ang iyang kamaayo sa grappling diin halos sa tibook round anaa sa ground ang dula pabor kang Brooks bisan og nakabawi si Pacio sa pila ka segundo na lang ang nahabilin. Sa pagsugod sa ikaduhang round, dinhe na nakakuha og benta si Pacio aron ma-takedown niya si Brooks ug wala na niya sayangi ang higayon hangtud nga gi-undang sa referee ang dula.
Tungod niini midaug si Pacio pinaagi sa technical knockout nga nakapahugyaw og samot sa iyang mga fans kansa live nga mitan-aw sa stadium sa Qatar.
Dako usab ang iyang pasalamat sa tanang mga Pinoy nga mituyo lang pag-adto sa arena aron live nga matan-aw ang iyang away.
