BUTUAN CITY – Nagpadayon karun ang protesta gawas sa parliyamento sa South Korea sukad nga gianunsiyo ni South Korean President Yoon Suk Yeol ang pagdeklara sa martial law.
Nasayrang tungang gabii na sa dihang gi-anunsiyo sa presidente ang pinaka-unang martial law sa South Korea.
Gigamit nga rason niini ang hulga gikan sa North Korea lakip na sa kalaban niini sa pulitika nga nakig-alayon matud pa sa North Korea og uban pang kalaban sa estado.
Tungod niini, miulbo ang protesta samtang daghan usab ang nagdali sa pag-uli sa ilang mga panimalay ilabina kay lakip sa martial law ang pag-aresto nga walay warrant.
Ang mga magbabalaod usab nga miyembro sa National Assembly mihimo og emergency late-night session. Sa 300 ka lingkuranan, 190 lang ang nakatambong sa maong sesyon diin ang tanan mibotar isip pagsupak sa maong deklarasyon sa martial law.
Base sa balaod sa South Korea, ang presidente dunay gahum nga magdeklara og extraordinary martial law basta pahibal-on lang niya ang National Assembly sa iyang disesyun.
Apan kung supakon kini sa majority sa magbabalaod, walay mahimo ang presidente kundi ang pagsunod niini. Human sa maong pagsupak, unanay usab nga nang-gawas ang mga sundalo nga misulod sa parliyamento apan nagpadayon ang protesta sa gawas niini.
Nasayrang ilalom sa martial law gibawal ang bisan unsang aktibidad sa parliyamento ug political parties samtang ang mga media ug publishers anaa sa ilalom sa kontrol sa martial law command.
