BUTUAN CITY – Gi-awhag karun sa mga otoridad sa Tandag Component City Police Station ang publiko ilabina kadtong dunay kasayuran sa suspek sa natigayong pagpamusil sa nakalabay nga gabii nga dili magduha-duha sa paghatag kanila og impormasyon aron kini mahatagan og kasolbaran.
Sumala sa kapulisan, natigayon ang insidente pasado alas 7:30 sa miaging gabii sa may Purok Quezon, Barangay Buenavista, Tandag City, Surigao del Sur.
Nahimong biktima niini ang 78-anyos nga lola nga si Adela Turaja Ayop, minyo ug residente sa maong lugar. Base sa pamahayag sa iyang bana nga si Juanito Ayop, samtang naghigda ang iyang asawa sa sopa og nagtan-aw og T.V., nakadungog siya nga adunay nanuktok sa pultahan katulo nga higayon, apan gibaliwala lang kini sa iyang asawa.
Subli siyang nakadungog og pagtuktok sa pultahan katulo gihapon ka higayon ug dinhe na nangutana ang iyang asawa kung kinsa kini apan walay mitubag. Mibarog matud pa ang iyang asawa ug mi-abli og gamay sa pultahan aron tan-awon kung kinsa ang nanuktok apan kalit lang nga gipusil ang iyang asawa sa maka-usa ka higayon gamit ang gidudahang kalibre .45 nga pistola. Na-igo sa iyang nawong ang biktima nga miresulta sa iyang hinanaling kamatayon.
Daling misibat ang wala mailang suspek paingon sa direksyon sa Tandag City.
