BUTUAN CITY – Sa pinaka-unang higayon sa kasaysayan sa Miss Universe, gihimo sa Pilipinas ang bag-ong korona nga maoy itaud sa Miss Universe 2024 winner.
Ang bag-ong korona nga gitawag og Light of Infinity nga ghimo sa Filipino craftsmen gikan sa international luxury jewelry company nga Jewelmer nga nakabase dinhi sa Pilipinas. Gidayan-dayanan kini og mga talagsaong golden south sea pearls gikan pa sa kadagatan sa Palawan ug nagkantidad og $5M kansa mao na ang ika-13 nga korona nga gamiton sa Miss Universe pageant.
Kagahapong adlawa, opisyal nang gipakita sa publiko ang bag-ong Miss Universe crown sa usa ka event sa Mexico City, Mexico diin himoon ang 73rd Miss Universe pageant ug ilugan sa 120 ka kandidata gikan sa nagkada-iyang nasud lakip na ang pambato sa Pilipinas nga si Chelsea Manalo.
Mi-abot na usab sa Mexico si Miss Universe 2018 Catriona Gray nga magsilbing backstage host alang sa gi-atangang coronation night karong Domingo, Nobyembre 17, oras sa Pilipinas.
