BUTUAN CITY – Padayon pang gi-imbestigahan sa kapulisan sa Buenavista, Agusan del Norte ang pagdaro sa usa ka 10-wheeler truck ngadto sa usa ka Honda TMX motorcycle apil na sa Hyundai Accent ug punuan sa dakong kahoy kagahapon sa alas-4:00 sa kaadlawon didto sa P-5, Barangay Alubihid, sakop sa maong lungsod.
Migawas sa inisyal nga imbestigasyon nga padulong unta sa panimalay sa pamilya Gelogo ug Cañete ang sakyanan human nakatagpilaw ang drayber niining si Samson Gordoncillo, 39-anyos, residente sa Bayugan City, Agusan del Sur.
Sakay ni Gordoncillo ang iyang anak nga babaye ug usa ka helper, gikan Cagayan de Oro City ug pa-uli na unta apan nadisgrasya human kini nakatagpilaw hinungdan nga nadala sa ospital ang anak sa maong drayber.
Gilayong gidala sa balay tambalanan ang anak sa drayber gumikan sa mga bun-og nga nahiaguman niini.
Wala’y natalang angol sa panimalay tungod kay naluwas man kini sa dakong punuan sa ilang tugkaran.
