BUTUAN CITY – Nadakpan sa kapulisan sa Lipa City sa Batangas ang tricycle driver nga si Vince Mojares Umali, ang gitudlong person of interest nga miluba-patay sa usa ka single mother nga supervisor sa mall ug sa menor-de-edad niining anak human gisulod ang ilang balay sa Barangay Pangao, Lipa City, Batangas niadtong Martes sa hapon.
Ang 41-anyos nga si Rhona Lalusin, napalgan sa ilang silingang si Eva Malabanan nga naligo sa iyang kaugalingong dugo nga anaa sa salog ug wala nay underwear samtang ang 17-anyos niining anak nga si Kurt Ace, napalgan usab nga patay sulod sa iyang kwarto ug duna’y samad-dinunggaban sa li-og ug nawong.
Sigon ni Lt. Col. Rix Villareal, hepe sa Lipa City Police Office, ila pang gihulat ang resulta sa gihimong eksaminasyon sa forensic unit aron makumpirma kung gilugos ba ang babaye nga duna’y 19 ka mga samad-dinunggaban.
Naaresto sa mga pulis si Umali sa gilusad nga hot pursuit operation sa terminal sa Barangay Marauoy, Lipa City, human nasuta sa ilang gihimong back-tracking investigation nga duna’y reklamong giduso ang biktima sa barangay hall, batuk sa suspetsado.
