BUTUAN CITY – Gihulat na lang sa Butuan City Police Office ang resulta sa laboratory examination nga gihimo sa Regional Forensic Unit o RFU-13 sa Police Regional Office-13 aron magamit sa ilang pagpasaka og tukmang kaso batuk sa pulis gikan sa Agusan del Sur nga nadakan sa gihimo;ng drug-buy bust operation sa Butuan City kagabii.
Sa eksklusibong pakighinabi sa Bombo Radyo Butuan, gipadayag ni Butuan City Police officer-in-charge PCol. Rommel Villamor, magdepende sa resulta sa laboratory examination ang ilang ipasakang kaso batuk nila Patrolman Michael Montalban Salgarino, 31-anyos, residente sa P-8, Brgy Salvacion, Bayugan City, Agusan del Sur ug kasamtangang nadestino sa 1st Provincial Mobile Force Company (PMFC) sa maong lalawigan ug sa mga sibilyan nga sila Jun Jun Magarin Madjos, 30-anyos, ulitawo, residente sa P-3, Brgy Tiniwisan ug Joel Sabaldan Fernandez, 25-anyos, ulitawo, wala’y trabaho ug residente ng IRA Homes, Brgy Baan Km. 3 parehong sakop ning siyudad sa Butuan.
Dugang sa opisyal, notadong drug user ug pusher ang duha ka sibilyan nga dugay nang higala ni Patrolman Salgarino ug tungod kay na-assign kini sa lungsod sa Sibagat, Agusan del Sur nga kasikbit lang sa Butuan City, rason nga gidalikyatan niya ang duha aron mugamit og ilegal nga druga .
Madumdumang nakuha gikan sa maong mga suspek ang 1 ka pakete sa heat-sealed transparent plastic sachet nga adunay sulod nga gituhoang shabu nga maoy buy-bust item, laing usa ka pakete sa heat-sealed transparent plastic sachet nga adunay sulod nga gituohang shabu; buy bust money nga nagkantidad og Php 500.00; 30 ka mga plastic transparent cellophane; ug 1 ka improvised nga dagom.
