BUTUAN CITY – Nag-atubang karon si kanhi presidential spokesperson Atty. Harry Roque og disbarment case nga giduso sa Korte Suprema ni kanhi cabinet secretary Atty. Melvin Matibag.
Nagdumili si Matibag pagbulgar sa mga detalye sa kaso, apan gibutyag niini ang mga isyu kalabot sa mga posts ni Roque sa social media, apil ang “polvoron” deepfake video kon digital nga gimanipula nga video kansa gilambigitan sa kanawong ni Pangulong Ferdinand Marcos, Jr. nga gika-ingong naggamit og ginadiling druga. Una nang nagbahad ang eksperto sa pagdaghan sa paggamit sa deepfakes human gipagawas ang maong pekeng video ni Marcos Jr. niadtong Hulyo kansa pagsulay matud pa sa pag-destabilize sa gobyerno.
Gipanghimakak ni Matibag nga ang disbarment case kabahin sa harassment efforts batuk kang Roque, nga mibatikos kang Pangulong Ferdinand Marcos Jr. ug nag-atubang og contempt charges gikan sa House of Representatives. Sigon ni Matibag, mahimong magpagawas ang Korte Suprema og jurisprudence kung kunsa ang maayong taras sa mga abogado ilabina sa social media.
Nasayrang wala pa’y partikular nga kasong nadesisyunan ang hukmanan may kalambigitan sa paggamit sa deepfake video batuk sa naglingkod nga pangulo sa nasud.
