BUTUAN CITY – Plano sa mga otoridad sa Zimbabwe nga mag-ihaw og 200 ka mga elepante aron mahapin-hapinan ang gutom nga tiyan sa mga tawo tungod sa grabeng kagutom nga hatud sa pinakagrabeng huwaw nga ilang nasinatian sulod sa upat na ka dekada. Tungod usab sa grabeng epekto sa El Niño phenomenon, dili na mapahimuslan ang mga tanom sa southern Africa, nga naka-apekto sa 68-milyones ka mga tawo.
Sigon ni Tinashe Farawo, Zimbabwe Parks and Wildlife Authority (Zimparks) spokesperson, ila nang gitun-an ang paagi pag-ihaw sa mga elepante kansang karne ipang-apod apod sa mga komunidad nga apektado sa grabeng huwaw. Ang pagpatay sa mga elepante, nga katapusang gihimo niadtong 1988, himuon sa mga distrito sa Hwange, Mbire, Tsholotsho ug Chiredzi.
Nadesisyunan kini human unang nag-ihaw ang ilang silingag nasud nga Namibia og 83 ka mga elepante ning mi-aging buwan aron ipanghatag ang karne sa mga tawong apektado usab sa grabeng ka-init. Nasayrang kapin sa 200,000 ka mga elepante ang anaa sa conservation area sa lima ka mga southern African countries nga Zimbabwe, Zambia, Botswana, Angola ug Namibia. Sigon ni Farawo, ang pagpatay sa mga elepante paagi na usab aron makuha-kuhaan ang ihap sa mga higanteng hayop sa ilang parke, nga alang lamang sa 55,000 ka mga elepante.
Nasayrang kapin sa 84,000 ang populasyon sa mga elepante sa Zimbabwe ug tungod sa grabeng huwaw, kanunay nga mag-engkuwentro ang mga tawo ug elepante sa pagpangita og mga pagkaon. Ning mi-aging mga tuig, 50 ka mga tawo ang namatay sa Zimbabwe tungod sa mga elephant attacks.
