BUTUAN CITY – Gipaniguro ni Taiwanese President Lai Ching-Te nga dili moyukbo ang ilang nasod sa China taliwala sa gihimo niini nga pagpang-harass kanila.
Sumala sa opisyal, ilang depensahan ang Taiwan ilabina ang kagawasan ingon man ang katungod sa ilang katawhan taliwala pa man sa hulga sa China, ingon man sa paggamit niini og mga non-traditional nga pamaagi arun lamang sila moyukbo sa China.
Gibutyag sa presidente nga padayon gihapon niining protektahan ang teritoryo ug soveranya sa Taiwan.
Kahinumdumang, pipila ka adlaw human nanumpa si Lai isip bag-ong presidente sa Taiwan, nagpahigayon gilayon ang China og war games sa Taiwan Strait isip silot sa inaugural speech ni President Lai.
Kahinumdumang gilibotan sa China ang estado sa Taiwan sa mga barkong iggugubat, fighter jets, ug mga coast guard vessels. Gihulga usab sa China ang Taiwan nga ipadayon ang military pressure kung magpadayon kini pagpanghingusog ang ilang independensya.
