BUTUAN CITY – Makonsiderang usa ka national security concerns ang mga criminal syndicates nga nagpaka aron-ingnong Philippine Offshore Gaming Operator kon POGO hubs.
Sigon ni Department of National Defense chief Gilberto Teodoro, dapat mapug-ngan ang kriminal nga mga kalihukan sa mga sindikato nga nag-operate sa atong nasud nga nagpaluya sa financial standing, ratings sa atong nasud ug giguba ang atong kumunidad.
Gihimo sa kalihim ang nasangpit nga pamahayag, usa ka adlaw human gibutyag sa Philippine Navy nga dili nila ikonsidera ang mga POGOs isip hulga sa national security bisan paman sa sunod-sunod nga raid nga gihimo.
Gibutyag sa Defense chief nga gi-analisa na sa mga awtoridad ang mga ebidensiya gikan sa impormasyong nakuha sa mga aktibidad sa POGO ug gihimong raid sa Tarlac ug Pampanga.
Madumdumang sa gihimong pagronda sa POGO hub sa Porac, Pampanga, nadiskubre sa mga awtoridad ang gidudahang mga uniporme sa sundalo sa China.
Apan gihupay sa Armed Forces of the Philippines ang kabalaka sa publiko ug gika-ingong posibleng gigamit lang kini isip props sa mga POGO workers sa ilang ilegal nga online transactions ug dili isip pagpangandam sa pagpanakop.
