BUTUAN CITY – Usa ka talagsaong lugar ang nahimutangan sa usa ka Automated Teller Machine kon ATM didto sa Pakistan gumikan kay anaa kini ibabaw sa bukid sa utlanan tali sa China ug Pakistan.
Nahimutang ang maong ATM sa gihabugong 4,693-meters nga gikonsiderang highest -altitude teller machine sa kalibutan.
Nasayran nga niadtong tuig 2016 gitukod kini sa Khun-jrab Pass sa Gilgit-Baltistan Province sa Northern Pakistan sa National Bank of Pakistan (NBP) nga usa ka solar ug wind-powered cash machine.
Milungtad og upat ka bulan ang pag-install niini gumikan sa kahabog sa bukid nga nahimutangan.
Mu-agi pa og grabeng kalisod ang trabahante kung adunay ipahigayon nga maintenance ug kalbaryo alang kanila ang pag-refill og kwarta sa machine sa regular basis.
Nasayrang gibutang sa maong lugar ang nasangpit nga ATM tungod sa kalayo sa bangko sa maong lugar ug alang usab kini sa mga kliyente nga sagad mga border guards nga didto na mokuha sa binulan nga sweldo, ug sa pipila ka mga residente nga nagpuyo sa boundary sa China ug Pakistan.
