BUTUAN CITY – Gidagsa sa gatusang mga job-seekers ang gilusad nga Kalayaan Job Fair 2024 dinhi sa Butuan City nga gipasi-ugdahan sa Department of Labor and Employment kon DOLE-Caraga subay sa pagsa-ulog ning adlawa sa ika-126 nga anibersaryo sa proklamasyon sa kaugalingnan sa Pilipinas.
Sigon ni DOLE Caraga Regional Director Joffrey Suyao, mi-abot sa 54 ka mga local ug tulo ka mga overseas recruitment agencies ang naghanyag og 4,800 ka mga bakanteng trabaho alang niadtong nangdagsa sa nasangpit nga kalihukan nga gipahigayon sa Dotties’ Place ning siyudad.
Dugang sa director, as of alas-12 kaganinang udto, duna na’y 28 ka mga aplikante ang swerteng na-apil sa HOTS kon Hired-On-the Spot.
Dugang pa ni Director Suyao, ubay-ubay pa nga mga serbisyo ang ilang gihanyag ning adlawa apil na niini ang Tulong Panghanapbuhay sa Ating Displaced/Disadvantaged Workers kon TUPAD payout alang niadtong 10,831 ka mga nanarbaho sa komunidad sulod sa napulo ngadto sa 15 ka adlaw.
Mi-abot matud pa sa kapin 52-milyunes pisos ang pundong gitagana sa nasudnong kagamhanan aron lang masweldo ngadto sa mga TUPAD beneficiaries ning rehiyon.
