BUTUAN CITY – Gikumpirma sa kapulisan sa Tagoloan, Misamis Oriental nga lakip sa ilang nadakpan sa Drug Buy-bust operation sa miaging adlaw sa Barangay Baluarte sa maong lungsod, ang usa ka aktibong pulis nga nadestino sa Police Regional Office kon PRO-13 kauban ang laing tulo ka indibidwal.
Giila ni Police Colonel Cholijun P Caduyac, Provincial Director sa Misamis Oriental Police Provincial Office, ang naarestong pulis nga si Police corporal Rhynhart Aguanta Asaytona, 35-anyos nga residente sa Purok-2, Mantibugao, Manolo Fortich, Bukidnon og nadestino sa Regional Mobile Force Batallion-13. Lakip sa mga naaresto sila Crispy Brandares Mancinades, 34-anyos, olitawo nga taga Zone-1, Nabulod, Baluarte nga maoy target sa operasyon; si Jonie Legaspi Estenzo, 35-anyos, usa ka panday nga taga Zone-2B, Baluarte og laing usa pa nga residente usab sa maong lugar.
Nakuha gikan sa posisyon sa mga suspek ang 7 ka sachet nga dunay sulod sa gitoohang shabu nga mitimbang og duha ka gramos og market value nga moabot sa 13-mil 600 pesos.
Lakip sa nakuha ang usa ka 9MM Taurus dunay serial number, usa ka steel magazine, unom ka buhing bala, 500 pesos nga kwartang gigamit isip buy-bust money ug mga drug paraphernalia.
Anaa karun sa kustodiya sa Tagoloan Municipal Police Station ang mga suspek alang sa tukmang disposasyon.
